Nuuk d. 9.9.2008
TUSAGASSIORTITSIGUT NALUNAARUT
Perorsaasut pillugt suliamut tunngatillugu Kalaallit Nunaanni Naalakkersuisut 100.000 kr.-imik akiliisinneqarnerat
Perorsaasut Ilinniarsimasut Kattuffiata. P.I.P:’p aammalu Kalaallit Nunaanni Naalakkersuisut akornanni suliat pillugit isumaqatigiissitsiniarnikkut eqqartuussinermi ataasinngornermi 8. September 2008-mi ingerlanneqartumi Kalaallit Nunaanni Naalakkersuisut 100.000 kr.-inik akiliisussanngortinneqarput. Peqatigitillugu isumaqatigiissitsiniarnikkut eqqartuussiviup aalajangerpaa, atorfiit inuttaqanngitsut arfinillit ulloq unnuarlu angerlarsimaffiup Qasapermiut, Sisimiuniittup, ukioq manna julip qaammataani inuttassarsiuussinerata imaa pillugu Kalaallit Nunaanni Naalakkersuisut aammalu P.I.P.’p isumaqatiginninniutigissagaat.
Qasapermiut meeqqat inuussutullu sumiginnakkat tigusarpai. Aallaaniarneq piniarnerlu angerlarsimaffiup perorsaanikkut suliaasa pingaaruteqartut ilagaat. Ataasinngormat isumaqatigiissitsiniarnikkut killisiunermi paasinarsivoq angerlarsimaffik perorsaasunik atorfinitsinngilluinnarsimasoq, pisortap tullia eqqaassanngikkaani.
P.I.P. 2007-imi suliat pillugit isumaqatigiissitsiniarnikkut eqqartuussiviup aalajangiineratigut qulakkeerlugu paasivaa, P.I.P.’p aammalu Kalaallit Nunaanni Naalakkersuisut akornanni isumaqatigiissummi perorsaanikkut sulineq ilaatinneqartoq. Tamanna atuuppoq suliaq perorsaasutut ilinniagalimmit suliarineqarnersoq apeqqutaatinnagu.
Januar 2007-imi Qasapermiut atorfiit 6 nutaat inuttassarsiuummagit, angerlarsimaffik P.I.P.’p qinnuigaa, atorfiit pineqartut perorsaasut pillugit isumaqatigiissummi ilaanerat uppernarsaqqullugu. Qasapermiut akissuteqanngimmata Ilaqutariinnermut Pisortaqarfik saaffiginnissuteqarfigineqarpoq. Tassanissaq pineqartut isumaqatigiissummi ilaatinneqarnersut erseqqissumik akineqarsinnaasimanngilaq. Tamaattumik P.I.P.’p eqqartuusissuserisuata Namminersornerullutik Oqartussat isumaqatigiissutinut immikkoortortaqarfia qinnuigaa suliaq isumaqatiginninniutigeqqullugu. Tamanna pinngilaq P.I.P.-lu 2008-mi junip qaammataani aalajangerpoq suliaq isumaqatigiissitsiniarnikkut eqqartussivimmut ingerlateqqinniarlugu.
Suliap aalajangiiffigineqarnera pillugu Isumaqatigiissitsiniarnikkut Eqqartuussiviup siulittaasua, eqqartuussiviit qullersaanni eqqartuussisoq Børge Dahl imatut oqaaseqarpoq:
”Isumaqatigiissuteqariaatsimi tunngaviusut ilagaat, isumaqatigiissut pillugu illua’tungeriit imminnut oqaloqatigiittarnissaat, aamma arlaanik isumaqatigiinngikkaluaraaniluunniit. Suliaq taanna imatut nilliaateqarpoq, illua’tungeriit imminnut oqaloqatigiissasut”.
Eqqartuussiviit qullersaanni eqqartuussisup oqaaseqarnermini tupiginerarpaa, Kalaallit Nunaanni meeqqat inuusuttullu sakkortunerpaamik eqqugaasimasut ilaannut angerlarsimaffik, atorfinnik inuttaqanngitsunik inuttassarsiusimammat, inuit perorsaanermik ilinniagallit ujartorneqarnerat taanagu. Illua’tungeriit tamarmik siumut isigisumik aaqqiisoqarnissaa soqutigisaqarmata, isumaqatigiissitsiniarnikkut eqqartuussiviup aalajangerpaa, suliaq Qasapermiuneersoq pillugu Naalakkersuisut P.I.P.-lu piviusut pillugit isumaqatiginninniartariaqartut atorfiit perorsaanermut tunngasunik imaqarnerata nassuiarnissaa siunertaralugu.
Isumaqatigiissitsiniarnikkut Eqqartuussiviup ilungersunarluinnartutut isigaa, isumaqatigiissummik tunngavissaqarneq pillugu P.I.P. allagarisimasaa januar 2007-imeersoq Qasapermiut akisimanngimmassuk aammalu Ilaqutariinnermut Pisortqarfik imaluunniit Aningaasaqarnermut Pisortaqarfiup isumaqatigiissutinut immikkoortortaqarfia P.I.P.’p eqqartuussissuserisuata saaffiginnissutaanut piviusorsiortumik akissuteqarsimanngimmata. Akissuteqarsimannginneq pissutaalluni, Naalakkersuisut pisussaaffilerneqarput akiliississutinik 100.000 kr.-inik P.I.P.-mut akiliinissaminnut.
P.I.P.’p kissaatigaa ajunngitsussaq anguniarlugu peqataasalluni, Kalaallit Nunaanni paaqqinniffiit, meeqqat inuussuttuaqqallu sumiginnakkat pillugit suliaqartussaasut, sulisut pikkorissut atorfinitsinnissaannut periarfissaqartitaanissaannut. Taamaattumik piumaqaarput suliat pillugit isumaqatigiissitsiniarnikkut eqqartuussiviup aalajangiinerani matuma iluatinnassusia pingaartinneqassasoq, tassalu illuatua’tungeriit ataatsimoorussamik isumaqatigiissummi ajornartorsiutit pilersut oqaloqatigiissutigissagaat.
Inussiarnersumik inuulluaqqusillunga
P.I.P. sinnerlugu
Kaaliina Skifte
Siulittaasoq.
Uunga saaffiginnittoqarsimmaavoq: P.I.P.’s eqqartuussissuserisua Henrik Karl Nielsen tlf. 0045-20143172.
27. august 2008
Akissarsianik qaffaatissat
Allareernertuut aammalu oqareernertuut, Namminersor-nerullutik Oqartussat neriorsuutigigaluarpaat akissarsiat qaffaataat aggustip naanerani tunniunneqartussaasut. Unali nalunaarut P.I.P.-p kingusinnerusukkut tiguvaa:
”Aningaasaqarnermut Sulisoqarnermullu pisortaqarfiup a-kissarsialeriviani sulisussaaleqineq pissutigalugu P.I.P.-mik isumaqatigiissut malillugu akissarsiat qaffaatissaat ajoralu-artumik august 2008-p naanerani tunniunneqarsinnaanngil-lat. Qaffaatissat utimoortumik 01. april 2008-miik atuutiler-
sumik september 2008-p naanerani tunniunneqassapput.
Tamanna kommuuninut tamanut aammalu Namminersorne-rullutik Oqartussat suliffeqarfiutaannut nalunaarutigeqqune-qarpoq.”
P.I.P.- p tamanna ajuusaarutigaa, kisiannili qanoq iliori-useqarfigisinnaanagu, taamaammat ilaasortagut aam-maarlugit naammagittaqussavagut.
P.I.P. sinnerlugu inussiarnersumik inuulluaqqusillunga
Kaaliina Skifte
Siulittaasoq
____________________________________________
Tusagassiutitigut Nalunaarut.
Matumuuna P.I.P.-miit tusagassiutitigut nalunaarutigaarput, P.I.P.-p ilaasortaminut isumaqatigiissummut nutaamut taasisitsinerata inernera imatullu isikkoqarpoq:
Ilaasortat taasisinnaasut 334-it taasinissaminnut periarfissinneqarsimapput.
Ilaasortanut taasititsinermi 62,6 % P.I.P.-mut utersimapput.
Isumaqatigiissummut akuersisut = 97,13 %
Isumaqatigiissummut naaggaartut = 0,96 %
Taasinermi atorsinnaanngitsut = 0,48 %
Taasinngitsoortut = 1,43 %
P.I.P.-p siulersuisuunerisa nuannaarutigaat isumaqatigiissut ukiunut sisamanut atuuttussamut ilaasortat akuersimmata.
Inussiarnersumik inuulluaqqusilluga
P.I.P.’p siulersuisuuneri sinnerlugit
Kaaliina Skifte
Siulittaasoq
Nuuk ulloq 16. maj 2008
Nuuk den 3. april 2008
Tusagassiorfinnut nalunaarut
Naalakkersuisut, KANUKOKA-p aamma perorsaasut akornanni isumaqatigiinniarnerit naammassipput
Naalakkersuisut aamma KANUKOKA Perorsaasut Ilinniarsimasut Peqatigiiffiannik (PIP), perorsaasunut sinniisuusut, isumaqatigiissummik nutaamik isumaqatigiissuteqarput. Isumaqatigiissut ukiuni sisamani 31. marts 2012 tungaanut atuutissaaq ulluunerani aamma ulloq unnuarlu paaqqinnittarfinni allanngujaassuseq pisariaqartinneqartoq pilersinniarlugu. Naalakkersuisut KANUKOKA-llu meeqqanut inuusuttunullu tunngassutillit pingaartittorujussuuaat aammalu meeqqat inuusuttullu atugarisaasa pitsaanerulernissaat ilinniagaqarsimasut amerlanerulernissaannut taamalu Kalaallit Nunaata ineriartorneranut siuarsaataasussatut isigalugu. Taamaattumik perorsaasut akissarsiatigut atorfeqartitaanerminnilu atugarisaasa pitsaanerulersinnissaannut aningaasat naalakkersuisut KANUKOKA-llu nassaarisimavaat neriuutigalugu perorsaasunngornissap taamatullu suliinnarnissap kajuminnarnerulernissaa kiisalu akisussaassuseqarluarluni pisortatut sulinissamut amerlanerusut piumassuseqalersikkumallugit. Immikkorluinnaq iliuuseqarnissamut piumassuseqarnerup takutippaa isumaqatigiinniarnernut atugassiissutit nalinginaasut qaavisigut naalakkersuisut KANUKOKA-lu PIP-imut aningaasanik amerlanernik neqerooruteqarsinnaanerat, taamaalillutik aningaasarsiat tunngaviusut, tapisiat atorfeqartitaanermilu atugassarititaasut allat ukiut sisamat tulliuttut ingerlanerini 17,0%-imik amerlanerulersinnaasimallutik. ”Aningaasarsiassanik qaffariaateqartitsineq nalinginnaanngilluinnartuuvoq” aningaasaqarnermut nunanullu allanut tunngasunut naalakkersuisoq Aleqa Hammond oqarpoq, taanna kattuffinnut allanut upernaap ingerlanerani isumaqatigiinniartussanut taama amerlaatigisunik aningaasassaqartitsinngilaq. ”Perorsaasut aningaasarsiaasa pitsaanngorsaavigineqarnerat meeqqanut inuusuttunullu tunngassuteqartut iluanni suliniutit amerlanerulernerinut takussutissaassaaq. Meeqqerivitsialak suliniutaavoq alla, perorsaasunik amerlanerungaartunik ilinniartitsinissaq, SPS-imi ilinniartitaanerup suliamik sammisaqarluni bacheloritut ilinniaganngortillugu qaffassarneqarnissaa perorsaasullu ilinniarteqqinneqartarnerisa ingerlaqqiffiusumillu ilinniartinneqartarnerisa siuarsaavigineqarnissaa annertuumik suliniuteqarfigaavut. Illuatungaatigut neriuutigaarput suliniuteqarnerput taanna ukiuni aggersuni kinguneqarluarumaartoq, ilaatigut meeqqerivinni periarsaasut amerlanerulernerisigut.” aningaasarsiat tunngaviusut qaffannerisa tapisiartinneqartullu amerlinerisa saniatigut sulisorisat 58-inik ukioqalereersimasut ulloqartinneqartalernissaat periarfissaqalerpoq. Tamanna Kalaallit Nunaanni pisortat suliffeqarfiutaanni aatsaavissuaq pivoq. Sulinngiffeqarnermi akiliunneqarluni angalatitsisarneq pitsaanerulersinneqarpoq meerartaarnermilu sulinngikkallarneq tamakkerlugu aningaasarsiaqartoqarsinnaalerluni. Soraarnerussutisiassat pitsanngorsaavigineqarput sumiiffinnilu isumaqatigiinniutigisassanut tapisianut immikkoortitat amerlineqarlutik, tamannalu kommuninit immikkut pingaartinneqarsimavoq. Paasissutissanik amerlanerusunik piumasoqarpat PIP aamma namminersornerullutik oqartussat isumaqatigiinniarnernut immikkoortortaat saaffigineqarnissaminnut piareersimapput. PIP-imi siulittaasoq Kaalina Skifte attavigineqarsinnaavoq, tlf. 55 69 04Isumaqatigiinniarnernut immmikkoortortami Palle Ømark attavigineqarsinnaavoq, 34 64 35, palo@gh.gl _________________ _______________________ Kaaliina Skifte Palle Ømark
TUSAGASSIORFINNUT NALUNAARUT Meeqqanik sumiginnaasarneq pillugu eqqartuussivilersuut siulleq maanna Nanortallip Kommunia pillugu PIP-mit unnerluussissut Nanortallip Eqqartuussianit suliarineqalerpoq. PIPp advokatiata ulloq 15. juni 2006 Nanortallip Eqqartuussivianut aggeqqusissut nassiuppaa. Unnerluussissut taanna aqqutigalugu Nanortalimmi anaanaasoq paniusorlu sinnerlugit PIPp piumasaraa eqqartuussiviup isummerfigissagaa paniusoq pillugu suliassap kommunimit suliarineqarnera Naalagaaffiit Peqatigiit (FN) Meeqqat pillugit Isumaqatigiissutaanut aammallu meeqqanut inuusuttuaqqanullu ikiorsiisarneq pillugu Inatsisartut peqqussutaannut naapertuunnersoq. Aggeqqusissummut ilanngunneqarput ilaliussat (bilag) 15-it maannamut kommunip suliassamik suliarinnissimaneranik uppernarsaataasut. Suliaq pineqartoq pillugu oktober 2004-mi kommunip aammalu Nanortalimmi nakorsaanerup akornanni allaqatigiittoqarpoq tassungalu tunngatillugu kommuni allappoq ilisimaneqartoq paniusoq imminoriaraluarsimasoq. Kingusinnerusukkut 2004-mi ukiakkut nakorsaanerup allappaa aasaanerani atuanngiffiup nalaaniilli paniusoq atuarusukkunnaarsimasoq. Suliaq Napparsimmaveqarfiup Sulianut tunngatillugu assigiinngitsuneersunit Ataatsimiititaliaanit ulloq 14. december 2004-mi oqaluuserineqarpoq tassanilu malugineqaluni atuarnissamut pisussaatitaaneq paniusup maleruanngikkaa. Nakorsaaneq isumasioqatigalugu Nanortallip Kommuniata misissiorpaa paniusup Danmarkimi efterskolernissaa periarfissaqarnersoq tamannalu anaanaasumit akuersaarneqarluni. Maj 2005-imi skolepsykologi nalunaarusiorpoq paniusup imminornissamik eqqarsaateqarsinnaanera aarleqqutigineqartoq oqaatigeqqinneqarluni nalunaarusiamilu allassimasoqarpoq paniusup atuarfiata akisussaaffigerusunngikkaapaniusup ilaqutaasa isumaginngimmassuk paniusup atuartitsinermi peqataanissaa. September 2005-imi Nanortallip Kommunia Danmarkimi efterskolemit attaveqarfigineqarpoq paniusup tigunissaa ammaffigineqartoq kommunilli paniusoq pillugu allattugaataani oqaatigineqarpoq suliaq ”unitsinneqaartoq” efterskolemiinnermut akiliutissaqm kommunip isumaa malillugu qaffasippallaarmat. Suliaq taanna suliat arlallit Kalaallit Nunaanni politimesterimut nalunaarutigineqartut ilagiinnarpaat, politimesterilli nalunaarutigisimavaa Nanortalimmi kommunalbestyrelsemi ilaasortat pillarneqarnissaannut inatsisit malillugit periarfissaqanngitsoq. Nanortallip Kommuniata januar 2005-imi ataatsimiinnermi allakkiami oqaatigineqarpoq suliani pineqartuni suliap suliarineqarsimanera pillugu naammagittaalliuteqarnissamut pissutaasinaasunik soqanngimmat. PIPp massakkut kissaatigaa innuttaasut pillugit eqqartuussivimmut suliassanngortitanut tunngatillugu eqqartuussiveqarfiup isummerfigissavaa suliassamik suliarinninneq suliamut matumunnga assersuutaasoq Naalagaaffiit Peqatigiiffiata meeqqat pillugit isumaqatigiissutaani aammalu meeqqanut inuusuttuaqqanullu ikiorsiisarneq pillugu Inarsisartut peqqussutaanni piumasaqaatinut naapertuunneqarsoq. PIPp ajuusaarutigilluinnarpaa suliassiissutip taama ittup pisariaqalersimanera. PIP isumaqarpoq pisariaqartuusoq Kalaallit Nunaani politimesteri aammalu Nanortallip Kommunia arlaannaalluunniit suliamik ingerlateqqissinnaasimannginnerat ingerlateqqikkusussimannginneralluunniit apeqqutaatinnagu suliaq suliareqqinneqartariaqartoq. Suliaq pillugu allanik apeqqutissaqartoqarpat saaffigineqarsinnaapput PIPp siulitaasua, Kaaliina Skifte, på tlf. 32 24 71/ 55 69 04 imaluunniit PIPp advokatia Henrik Karl Nielsen, Norsker & Co. Advokater tlf. 0045 3343 3100. Nuuk, ulloq 16. juni 2006 Kaaliina Skifte (ny formand pr. 1.oktober 2006)Nuna tamakkerlugu siulittaasoq